عودا ً حميداً
السلام عليكم ورحمه الله و بركاته
هيلوو .... كيف حالكن جميعاً
حرفياً من زمان مره عن المدونه اكثثثر من سنه مرت يمكن سنه ونصف من نهايه الـ ٢٠١٧
صارت احداث كثيييره بحياتي بدايه من نهايه 2017 واخيراً اتوظفت بعد رحله طويله
من البطاله اتوظفت بدايه بمؤسسه محليه كنت اشتغل على موقعهم الكتروني لبيع
الدراجات الرياضيه اخذت خبره مره جمييله بالتسويق وكمان تعلمت لغه برمجيه
جديده تعلمت كمان كيف اسوي صفقات ومناقصات وكذا شغلاات بعدين
انتقلت لشركة ارامكو واشتغلت بتخصصي تماماً لمده ٦ شهور بعدها صار
تغيير جديد بحياتي انتقالي لمدينه الرياض وحملي بصغيرتي لينة
الي قررت اتفرغ لها هالسنه الأولى من حياتها واشتغل علي نفسي كمان بشغلات
الي حسيت انها تحتاج تطوير
كانت جد سنتين مشيت كذا زي رمش العين كانت تجري تجري ماكنت الاقي وقت لنفسي
يادوب دحين الي لقيت وقلت خليني اكتب تدوينه صح انها ملخبطه تقريبا
التغيرات الي صارت بحياتي كثير وخصوصاً لما دخلت بيئة الشغل وقابلت ناس
ماعرف اقدر اقول الحمدالله بالمكانين ربي مارزقني الا بالناس الطيبه مره الي حبيتها
من كل قلبي ....
الشغل مو صعب مو زي ماكنت متخيله كنت خايفه ماكنت ابغا اتوظف شايله
هم الالتزام وقومه الصبح مع انو انا اصلا بقوم من صباااح بدري مره مره
انو تشوفي ناس جديده وتتعرفي وتكوني علاقات جميله انو تشوفي الابتسامه
الي بتخلقيها علي وجوه الناس لما تسلمي عليهم ماعرف بالمكانين كانو ناس مريحه
كنت كل مادخل بوابه المكتب بارامكو واشوف الناس الي تدخل كنت زي مابحلم
انو اشتغل بشركه كبييييره مبناها قزاز كذا بالله كنت اعيش حلمي حرفياً
لما جا خبر نقل زوجي لمدينه الرياض وخيرني مازعلت انو بترك المكان لانو خييره
خاصه انو كانت في روح صغيره جواتي كنت مشتاقه لها مررره كنت شايله
هم كيف اوفق بينها وبين دي روح كان هي الخيره
وباذن الله بس تكبر لينة راح ارجع اشتغل بمكان زي كذا ويارب يرزقني
كمان بناس لطيفه زي كل الي قابلتهم من اريج واثير وعائشه
اتعلمت كمان دي سنه انو احترم افكار الناس مهما كانت غلط مو من حقي
اصححلهم مع انو الامر بالمعروف ونهي عن المنكر واجب
بس احنا بالزمن كسب موده الناس اولى من انو اكسب عداوه احد
اتعلمت كيف اهتم بالنونو من جديد ورجعت كاني ام للمره الاولى
على العطسه اطير المستشفى واسئل عادي او لا
نسقت استقبالي من الي بنفسي انا واختي وماما اتعاملت مع علي بابا وجبت التوزيعات
دحين بديتت ارجع لنفسي وحياتي .. ابغا اسوي رياضه تاني ابغا اقرأ
ابغا ابدء بزنس ان شاءالله راح افرش بيت جديد من إلي وراح اصورو لك بالخطوات
حابه ارجع لنفسي واهتمامتي اهتم بنفسي واحتفل بنفسي واعيشش انا
حتكون عوده موفقه باذن الله
باذن الله حيكون لي تنظيم في التدونيات وكدا
واحببكم
0 التعليقات