اهلاً .... اهلاً
ازيوكم ..
خلص العيد ،، والنوم لسه ماتعدل مخربطط مرره ..
ماعرف كيف عدى رمضان بدي السرعه فعلاً ماحسييت فيلو ابد .
الله يعيدو علينا جميعاً يارب بالخير والصحه والعافيه يارب .
يوم 20-3 -2019 ربي باركلي وتمملي حملي ولدت اميرة قلبي " لينا " كنت مستعده ومتجهزة
كنت حرفياً ابغا بس اولد عشان اشوفها واضمها واشمها كنت مشتاقه لجيتها مره
طول عمري احلم يكوم عندي " بنت " تكون صديقتي وقريبه لقلبي مره طبعاً
مايهون حمودي هو ابويا واخويا ولدي وعمري كلوو بس البنات غير وجودهم بالبيت غير
من بدايه حملي قعدت ادور عن ثيم واتفرج بالبنترست واجمع صور حطيت صوره
معينه بالي ايش ابغا كنت حددت اللون وثيم ..
في معمة البحث لقيت شي الي بسويه حيكون مكلف منجد مكلف وحرام لانو ماعرف
لو في احد بيجي او مابيجي والاسعار الي حاطينها تاجرات خرافيه
يعني جد اتمنى بس تكون في مراعاة المبالغه الموجوده بالاسعار وخاصه مافي مكاسره
او اي شي والمشكله كلو مكرر وسعر يفرق من تاجره لتاجره عشان كذا قررت
اسوي كل شي بنفسي ومن الموجود هنا
اول شي قعدت اسوي توقع لعدد الناس الي حيجوني ... فكان الاكيد
والي لازم يجو كان عددهم قريب ٥٠ وقلت ٥٠ زياده لناس
البعاد الي مو اكيد او لازم يجوو زي جيران ماما والابلات صحبات ماما وابلاتي
حقون الثنوي.. بحكم انو كنت عند خالتي بالثنوي فبشوفهم دايم ، صحباتي
صحبات اختي .
وقررت ايش ابغا حددت الونين البنك مع ذهبي و دخلت علي اكسبريس و استخدمت بعض key word الي تدل على توزيعات وطلعتلي مجموعه واخترت شكلين اخترت مرايات كوتش وعلب هرميه لطيفه قررت احط جواها شوكلاته
اول شي الكراتين الهرميه
اخذت ١٠٠ بمالا يتجاوز ١٠٠ ريال
كمان اخذت مرايات كوتش
اخذت ١٠٠ حبه بحوالي 540 ريال وحددت الالوان الي ابغاها
بعدين رحت ابحبش بالانستجرام ولقيت تاجره تعمل الحجر المعطر وسعرها مره طيب برضو اخدت ١٠٠ حبه
اخذتها وجبت هادي العلب البلاستيكه ودخلت الحجره فيها وزينتها بشريطه الي استخدمتها كمان
بتزين المرايه
اخر شي واخر نوع اخترتو شوكلاته برضو من حساب ع الانستجرام وسعرها كان طيب برضو
ولكن حقيقه الشكل مرره جميل بس الطعم مره ماعجبتني يعني كشكل فقط
رحت محل اسمو الحربي عندنا بالمدينه وكملت باقي التنسيقات اخدت منو شرايط واخذت ورد صناعي
وكمان اخذت منو الستاند حق الاسم والعبارات بـ 50 ريال وزينتو بالورد الصناعي اخدت مجموعه من
الورد الصناعي تقريبا بـ 300 ريال استخدمتها بالاستاند وكمان سرير البي بي وكمان بالفازات
وزينت الستاند بالورد ورحت محلات الطباعه وسويت لوحه الكلريك وكتبت عليها الاسم والعباره بـ 90 ريال
ومنظر الطاوله بالاخير
بالنسبه للبسي للاستقبال اخترت البس من شويس
ولبس بنوتتي اعتمدت على لبسين الاول نفس هادا طلبتو اون لاين لولدي الاول
ولبس الثاني كان مدس بلبسو كامل من فرزاتشي القرعاوي بالمملكه
بالنسبه لتقديمات للاسف نسيت اصورها بس كانت صحن شوكلاته من باتشي
واعواد مالحه وحاليه من لافنتاس شوكلاته مكشوفه من لافنتاس وكمان فطيره تفاح
ومعمول من حريم وصحن معجنات ومقالي شغل بيت طبعاً حاولت اسوي تاقات
بس ماعجبتني النتيجه ولا اقتنعت بولا وحده فماطبعتها :)
الاستعداد والاستقبال حلو بنفسك تسوي تحسي بمتعه جميييله لما انت تسوي كل حاجه
بحبك تحسي بمتعه وفخر لما تشوفي نتيجه شغلك
وبكذا اكون خلصت ولاي استفسار انا حاضره :)
